ავტორი: https://simsivne.ge

ჰორმონოთერაპია (ენდოკრინული თერაპია) სიმსივნის მედიკამენტური თერაპიის ფორმაა, რომლითაც ჰორმონდამოკიდებულ სიმსივნეებს მკურნალობენ.

მედიკამენტების საშუალებით იბლოკება ან მცირდება ორგანიზმში ჰორმონების რაოდენობა, რაც ხელს უშლის კიბოს უჯრედების ზრდასა და გამრავლებას, თუმცა ეს მეთოდი ყველა ტიპის კიბოსთვის არ არის ეფექტური.

ჰორმონდადებითი კიბოს ტიპები მოიცავს:

ძუძუს კიბო

პროსტატის კიბო

საშვილოსნოს კიბო

იშვიათ შემთხვევებში გამოიყენება საკვერცხის კიბოს სამკურნალოდაც

ჰორმონდადებითი ძუძუს კიბოს შემთხვევაში

ჰორმონოთერაპია შესაძლოა დაინიშნოს ქირურგიულ ოპერაციამდე, რათა სიმსივნე შემცდირდეს ზომაში. თუმცა, ძირითადად, ინიშნება აქტიური მკურნალობის (ოპერაცია, ქიმიოთერაპია, სხივური თერაპია) დასრულების შემდეგ.

რომელი ტიპის ჰორმონოთერაპიას გაივლით და რამდენი ხნის განმავლობაში, დამოკიდებულია შემდეგ ფაქტორებზე:

გაქვთ თუ არა მენოპაუზა (კლიმაქსი);

რამდენად მაღალია კიბოს ხელახლა გაჩენის რისკი;

რამდენად ასატანია შერჩეული მედიკამენტის გვერდითი მოვლენები;

პაციენტის დიაგნოზის, ასაკის, ზოგადი ჯანმრთელობის გათვალისწინებით ექიმი ნიშნავს შესაბამის მედიკამენტს. ჰორმონოთერაპია გრძელდება რამდენიმე წელიწადს, მაქსიმუმ 10 წელი.

ჰორმონოთერაპია ამცირებს ძუძუს კიბოს დაბრუნების რისკს. მნიშვნელოვანია, რომ მკურნალობა დანიშნული დროის განმავლობაში სრულად ჩაიტაროთ. შეეცადეთ, რომ პრეპარატების მიღება თქვენი ყოველდღიური რუტინის ნაწილად აქციოთ.

პაციენტების უმეტესობა ჰორმონოთერაპიის გვერდით მოვლენებს კარგად ეგუება. ზოგიერთი გვერდითი მოვლენა განსაკუთრებით მკვეთრად ვლინდება პირველ თვეებში, თუმცა დროთა განმავლობაში საგრძნობლად უმჯობესდება.

თუ გვერდითი მოვლენები არ იკლებს ან მათთან გამკლავება რთულია, აუცილებლად ესაუბრეთ თქვენს ონკოლოგს, რათა გამონახოთ ალტერნატიული გზები მათ შესამსუბუქებლად.

არსებობს ზოგიერთი გვერდითი მოვლენა, რომელსაც ჰორმონული თერაპიის ყველა პრეპარატი იწვევს, თუმცა ზოგიერთი გვერდითი მოვლენა სპეციფიკურია კონკრეტული მედიკამენტისთვის. ჰკითხეთ ექიმს, თქვენი მედიკამენტის შემთხვევაში, რა გვერდით მოვლენებს უნდა ელოდეთ.

ჰორმონული თერაპიის ყველაზე გავრცელებული გვერდითი მოვლენებია:

ალები (hot flushes) და ოფლიანობა

მენსტრუალური ციკლის ცვლილებები (თუ მენოპაუზამდე ხართ)

სექსის მიმართ ინტერესის შემცირება

ვაგინალური სიმშრალე ან გამონადენი

გულისრევა

სახსრების ტკივილი

განწყობის ცვლილებები

გადაღლილობა

გამოყენებული წყარო:

https://gsco.ge

https://www.cancerresearchuk.org/…/trea…/hormone-therapy

https://www.macmillan.org.uk/…/hormonal-therapy-for…

https://medconsilium.ge/…/hormonoterapiis-gzamkvlevi