PET- იგივე პოზიტრონული ემისიური ტომოგრაფია — ეს არის თანამედროვე, მაღალტექნოლოგიური გამოკვლევა, რომელიც ადრეულ ეტაპზე ამოიცნობს კიბოს, გულის და ტვინის დაავადებებს.
ხშირად ტარდება კომპიუტერულ ტომოგრაფიასთან (CT) ერთად — ამ კომბინაციას ეწოდება PET/CT.
განსხვავებით სხვა კვლევებისგან, PET არ გვაჩვენებს მხოლოდ ორგანოს სტრუქტურას — ის აფიქსირებს მეტაბოლიზმისა და სხეულის ბიოქიმიური პროცესების ცვლილებებს. ამ ცვლილებების ნიმუშების შეფასება სხვადასხვა დაავადების დიაგნოსტიკას უწყობს ხელს.
რა მიზნით ინიშნება PET/CT?
კიბოს დიაგნოსტიკისა და სტადიის დასადგენად
მეტასტაზების აღმოსაჩენად და პირველადი კერის დასადგენად
მკურნალობის ეფექტურობის შესაფასებლად (ქიმიო და სხივური თერაპიის შემდეგ)
დაავადების დაბრუნების (რეციდივის) შესამოწმებლად
როგორ ტარდება PET/CT სკანირება?
პროცედურა სრულიად უმტკივნეულოა.
პაციენტის ვენაში შეჰყავთ მცირე რაოდენობის რადიოაქტიური პრეპარატი (იზოტოპი), რომელიც გროვდება იმ ადგილებში, სადაც მეტაბოლური აქტივობა — ანუ უჯრედების მუშაობა — უფრო მაღალია.
სკანერი აფიქსირებს ამ სიგნალებს და ქმნის დეტალურ სამგანზომილებიან გამოსახულებას.
პროცედურა გრძელდება დაახლოებით 1.5–2 საათი, თავად სკანირება კი — მხოლოდ 20–30 წუთი.
როგორ მოვემზადოთ PET სკანირებისთვის?
კვლევამდე 24 საათით ადრე:
მოერიდეთ ნახშირწყლებით მდიდარ საკვებს (პური, ტკბილეული, ბურღულეული, მაკარონი, ხილი, წვენები) მიზეზი მარტივია: ნახშირწყლები ზრდის სისხლში გლუკოზის დონეს, რაც „აბნევს“ სკანირებას — რადგან PET აფიქსირებს სწორედ გლუკოზის მეტაბოლიზმს, სიმსივნის უჯრედები კი მას განსაკუთრებით აქტიურად ითვისებენ.
მიაწოდეთ ექიმს ინფორმაცია ყველა მედიკამენტზე, ვიტამინსა და დამატებზე, რასაც იღებთ.
6 საათით ადრე აღარ მიირთვათ საკვები (თუ დიაბეტი გაქვთ — ექიმის მითითებით).
შეგიძლიათ დალიოთ მხოლოდ წყალი — რაც მეტს დალევთ, მით უკეთესად და დროულად გამოიდევნება რადიოაქტიური ნივთიერება ორგანიზმიდან.
მოერიდეთ კოფეინს და ფიზიკურ დატვირთვას 24 საათით ადრე.
ატარეთ მოსახერხებელი ტანსაცმელი და მოიხსენით მეტალის ნივთები.
ორსულობის ან ძუძუთი კვების შემთხვევაში აუცილებლად აცნობეთ ექიმს.
თუ გაქვთ კლაუსტროფობია, შეგიძლიათ წინასწარ მიიღოთ მსუბუქი დამამშვიდებელი.
არის თუ არა უსაფრთხო?
PET/CT სრულიად უსაფრთხო გამოკვლევად ითვლება.
რადიაციის დოზა ძალიან მცირეა და მალე გამოდის ორგანიზმიდან.
იშვიათად შეიძლება განვითარდეს მსუბუქი ალერგიული რეაქცია ან ინექციის ადგილის გაღიზიანება.
PET-ტესტის შედეგები მომზადდება 48 საათში.
„ცხელი წერტილები“ (hot spots) მიუთითებს მეტაბოლური აქტივობის ზრდაზე (შეიძლება კიბო იყოს, მაგრამ სხვა მიზეზებიც არსებობს).
„ცივი წერტილები“ (cold spots) მიუთითებს აქტივობის დაქვეითებაზე (სისხლის ნაკადის დაქვეითება, ქსოვილის ნეკროზი).
საბოლოო ინტერპრეტაცია უნდა გააკეთოს ონკოლოგმა და პათოლოგმა.
თუ თქვენი ექიმი გირჩევთ PET/CT-ს, ნუ ინერვიულებთ — ეს არის უსაფრთხო, უმტკივნეულო და ძალიან ეფექტური გამოკვლევა, რომელიც დიაგნოსტირებისა და მკურნალობის კურსის განსაზღვრისთვის მნიშვნელოვანი ნაბიჯია.
გთხოვთ გადააზიროთ პოსტი, რათა მეტმა ადამიანმა შეიტყოს ჩვენი გვერდის შესახებ 
გამოყენებული წყარო:
PET Scan: Purpose, Procedure, and Side Effects
PET Scan: What It Is, Types, Purpose, Procedure & Results
Positron emission tomography scan – Mayo Clinic